Паэтка. Нарадзілася 1 студзеня 1985 года ў горадзе шахцёраў Салігорску Мінскай вобласці. Друкавацца пачала ў школьным узросце. Пасля заканчэння Салігорскай гімназіі паступіла ў Мінскі дзяржаўны лінгвістычны універсітэт, факультэт міжкультурных камунікацый, дзе акрамя асноўных дысцыплін і агульных прадметаў вывучала французскую, англійскую і нямецкую мовы, а таксама турызм. Пасля заканчэння універсітэта працуе ў Мінску. Цікавіцца перакладамі і рэкламай, актыўна ўдзельнічае ў літаратурных мерапрыемствах. Аўтарка зборніка вершаў “Сонца за тэрыконамі”, які выйшаў у 2007 годзе ў выдавецтве “Мастацкая літаратура”. Сімвал першай кніжкі - сонца, якое ўзыходзіць. Спрабуе пісаць вершы на французскай мове. Таксама мае шэраг публікацый - вершаў, артыкулаў і замалёвак - у часопісах “Полымя”, “Маладосць”, “Вожык”, газетах “ЛіМ”, “Раніца”, “Голас Радзімы” і іншых.




***
З твару не пазнаеш мяне,
Ды сонца тваё начлежнае
Свяціла мне проста ў вокны
Так, што хацелася змоўкнуць
Аповесцю абарванай.

Годзе заказваць танец—
Музыка яго перайначыў.
Ціха смяецца скрыпка,
А людзям здаецца—плача.

З прорвы паспею крыкнуць:
“Гэта не ваша справа!”
Толькі ў адказ пачую:
“Брава, актрыса, брава!”